連線Teen空 — 與青年病人溝通小貼士

在少年時期，除左返學以外，青年人大都過著打波打機追星無憂無慮嘅生活，但當疾病找上青年人，生活一下子全盤被打亂。多了一個「病人」身份嘅「青年人」，究竟治療期間嘅佢哋有什麼諗法？最關注什麼？以下群組之間嘅對話，分享了「青年病人」面對嘅困難，小編亦提供了溝通小貼士，現在就讓我哋一同起步，展開關心「青年病人」嘅第一步。

連線Teen空@返學篇

家長陳女士：
我最近認識到幾位青年病人，佢哋有以下嘅擔心：
「功課成績會唔會追唔上？」
「我嘅身體和精神狀況可以讓我繼續應付學業嗎？」
「我係咪要休學？」
咁我哋可以點樣回應？

小編
我哋可以先欣賞青年病人種種優點 ，例如關心自己嘅學業成績、同時覺察自己嘅身體狀態，並願意向身邊人分享自己憂慮等等。
對於一般嘅高中生來說，DSE或許已是一場硬仗，而就讀高中嘅青年病人，又要面對治療，同時又要應付DSE，壓力更加大。
我哋可以與青年病人一齊訂立短、中、長期計劃，按身體舒適嘅節奏，一步一步地完成學習目標。家長亦可以與青年病人和校方一同探討學業支援方案，例如進行課程調適或延伸測驗評估時間，增加治療中嘅青年病人對學業嘅掌控感。

小編
不妨跟青年病人說：
「不要責備已全力以赴的自己」
「未來，睇學歷，亦會睇人生經歷！學歷成績並非人生的唯一指標，人生態度，個人興趣等都同樣重要架。」

連線Teen空@社交篇

學校張老師：
原來青年病人在交朋結友上都遇到唔少困難，例如以下嘅難題：
「因為我之前休學，依家要做插班生，我好驚同學已經埋哂堆，我唔知點樣識佢地」
「我講唔講俾同學知我患病？如果講，講幾多？點樣講？唔知佢地點樣睇我呢？」
我哋可以有咩建議俾佢地？

小編
我哋可以鼓勵青年病人同父母、醫護、老師、社工、臨床心理學家等一齊商討認識新朋友仔或透露病情嘅對策。與校方加強溝通，做好準備，有助佢哋重返校園。
無論係認識新朋友定係向同學透露病情，最緊要係先評估青年病人嘅身心狀態係咪Ready，Ready先可以Get Set! Go架！如果青年病人Ready認識新朋友，佢哋可以由個人興趣去打開話題，因為興趣絕對係開心經歷同埋美好回憶，仲容易建立共同話題添！呢個都可能係大朋友同青年人破冰嘅小貼士，大家不妨試下啦！

連線Teen空@家庭篇

家長黃先生：
我個仔係長期病患青年病人，呢段時間佢心情有時會好差，咩人都唔想見，佢同我講「我身心都好，我只想抖下，咩都唔想做，唔想理屋企人同其他人」我哋又可以點做？

小編
容讓青年病人有自己嘅個人空間，此時此刻讓佢哋感受到家人一直守候在旁，並與佢哋同行，已經足夠。同時家人都需要擁有喘息空間，大家就各自為自己創造一下「Me Time」！食吓嘢、聽吓歌、煲吓劇，適時放鬆充充電！

小編
充電時，不妨聽下青年病人推介嘅歌，例如其中一首歌叫做《Answer: Love Myself》，係由韓國男團唱架！好多個青年病人都表示呢首歌陪佢哋走過高山低谷，歌詞表達咗「最重要的事情，其實係愛自己」。 # You've shown me I have reasons I should love myself… I'm learning how to love myself

小編的話
我係香港兒童醫院病人資源中心社工蘇姑娘，亦係呢篇貼文嘅小編。在我加入香港兒童醫院工作前，過去多年亦是與青年人同行，提供青年工作服務。近日有位照顧青年病人嘅家長向我分享：「冇病嘅人要去理解患病人士嘅需要，難！成年人，要進入青年病人嘅內心世界，更難！！」雖然難，但相信我哋身邊仍然有好多關愛青年病人嘅伙伴，包括佢哋既父母、照顧者、醫護同事、師長、朋友、素未謀面嘅有心人，仲有你和我，都用緊不同形式，默默表達關心。就讓我哋繼續與青年病人連線，一齊為青年病人注入力量！